2026 – 27 நிதியாண்டின் முதல் ஆறு மாதங்களுக்கு இந்திய அரசு ரூ.8.2 லட்சம் கோடி கடன் பெற திட்டமிட்டுள்ளது. இது முழு ஆண்டிற்கான கடன் தொகையின் சுமார் பாதியாகும் என்று அரசு வெள்ளிக்கிழமை வெளியிட்ட அறிக்கையில் தெரிவித்துள்ளது.
முன்பு பட்ஜெட்டில் ரூ.17.2 லட்சம் கோடி என அறிவிக்கப்பட்ட மொத்த கடன் திட்டத்தை, தற்போது ரூ.16.09 லட்சம் கோடியாக அரசு குறைத்துள்ளது. மேலும், மிக நீண்ட கால (30 முதல் 50 ஆண்டு) பத்திரங்கள் மூலம் பெறும் கடனின் அளவும் குறைக்கப்பட்டுள்ளது. இதனால் அரசுப் பத்திர வட்டி விகிதங்கள் மேலும் அதிகரிப்பதை கட்டுப்படுத்தலாம் என கருதப்படுகிறது.
ஏப்ரல் முதல் செப்டம்பர் வரை பெறப்படும் கடனில் சுமார் 25% மட்டும் 30–50 ஆண்டு கால பத்திரங்களில் இருந்து வரும். இது முந்தைய காலகட்டத்தை விட குறைவாகும்.
ப்ளூம்பெர்க் கணிப்பில் ரூ.8.7 லட்சம் கோடி கடன் பெறப்படும் என எதிர்பார்க்கப்பட்ட நிலையில், அரசு அறிவித்த தொகை அதைவிட குறைவாக உள்ளது. ஆனால் நடப்பு ஆண்டில் பெறப்பட்ட ரூ.7.95 லட்சம் கோடியை விட இது அதிகமாகும்.
இதற்கிடையில், பெட்ரோல், டீசல் போன்ற எரிபொருட்களுக்கு வரி குறைத்ததால் அரசுக்கு ஆண்டுக்கு சுமார் ரூ.1.6 லட்சம் கோடி வருவாய் இழப்பு ஏற்படும் என மதிப்பிடப்படுகிறது. இதனால் அரசின் நிதிநிலை மீது அழுத்தம் அதிகரிக்கும் என்பதால், அரசுப் பத்திர வட்டி விகிதங்கள் உயர்ந்துள்ளன.
முதல் ஆறு மாத கடன் திட்டத்தில், 10 ஆண்டு கால அரசுப் பத்திரங்கள் முக்கிய பங்கைக் கொண்டு 29% ஆக நிர்ணயிக்கப்பட்டுள்ளன. இதனுடன், 15 ஆண்டு கால பத்திரங்கள் 14.5% ஆகவும், 5 ஆண்டு கால பத்திரங்கள் 15.4% ஆகவும் இடம்பெற்றுள்ளன.
மேலும், ஏப்ரல் முதல் ஜூன் காலாண்டில் மட்டும் குறுகிய கால கடன் பத்திரங்கள் மூலம் ரூ.2.88 லட்சம் கோடி கடன் பெற அரசு திட்டமிட்டுள்ளது.
மொத்தத்தில், எரிபொருள் விலை, பணவீக்கம் மற்றும் நிதி பற்றாக்குறை கவலைகள் காரணமாக, அரசின் கடன் திட்டம் மற்றும் பத்திர சந்தை நிலை கவனத்திற்கு வந்துள்ளது என்று ப்ளூம்பெர்க் செய்தி தெரிவிக்கிறது.
[youtube-feed feed=1]