பெய்த மழை உணர்த்திவிட்டது
அரசியல் செய்தோரை
மந்திரிகள் உணர்த்திவிட்டனர்
தத்தம் மனநிலையை
நடிப்பவர் யார் என நன்றாக
தெரிந்துவிட்டது நமக்கு
ஆக்கிரமித்தது தன் இடத்திலென
அழித்துச் சென்றது மழை
கட்டமைப்பின் அழகை
காட்டிச் சென்றது மாமழை
மூச்சு திணறி கிடந்த ஆறுகள்
முடியாமல் விட்ட பெருமூச்சே இவை
காலாவதியான ஆறு குளங்களின்
எண்ணிக்கையை கணக்கெடுத்து
காட்டியிருக்கிறது கனமழை
அடைமழை சொல்லித் தந்திருக்கிறது
அன்பு மழையை
ஓங்கி பெய்த மழை உணர்த்திவிட்டது
ஒன்றுபட்டால் உண்டு வாழ்வு என்று
மழை வேண்டாம் என கோபம்
கொள்ளும் மக்களிடம் ஊழல்
அரசியல்வாதிகள் வேண்டாமென
கொதிக்காதது ஏன் என
கொதித்துச் சென்றிருக்கிறது மழை
அழிக்கப்பட்ட ஏரிகளில் ஆக்கிரமித்த
வீடுகளால் வந்து விட்டது சேதம்
தவறு செய்த அரசியல்வாதிகளை
தட்டிக்கேட்காமல் வாக்களித்து விட்டு
தரம் குறைந்த சாலைக்கு
மௌனமாய் வரிசெலுத்திவிட்டு
மழையைப் பழிப்பது மாபெரும் பாவம்..!
– பானுப்ரியா