சென்னை: அரசு ஊழியர்களுக்கு ரேசன் பொருட்கள் கிடையாது என தமிழகஅரசு அறிவித்துள்ளதாக தனியார் ஊடகம் ஒன்றில் செய்தி வெளியாகி பரபரப்பை ஏற்படுத்தியது. இந்த நிலையில், அந்த செய்திக்கு மறுப்பு தெரிவித்து, தமிழக அரசு விளக்கம் அளித்துள்ளது.
மத்திய, மாநில அரசு ஊழியர்கள், அதிக ஆண்டு வருமானம் 1லட்சத்துக்கும் அதிகமாக பெறுவோர், 3 அறைகளுக்கு மேலான சொந்த வீடு வைத்திருப்போர், ஐந்து ஏக்கருக்கு மேல் நிலம் வைத்திருக்கும் விவசாயிகளுக்கு ரேஷனில் அரிசி உள்பட ரேசன் பொருட்கட்ள வழங்கப்படாது என்று ஊடகம் ஒன்றில் செய்தி வெளியானது. இதுசமூக வலைதளங்களில் வைரலானது. இதை பார்த்த பலர் அதிர்ச்சி தெரிவித்தனர்.
இந்த நிலையில், வெளியான பொய் செய்தி குறித்து, கூட்டுறவு, உணவு மற்றும் நுகர்வோர் பாதுகாப்புத் துறை விளக்கம் வெளியிட்டு உள்ளது.
இதுகுறித்து கூட்டுறவு, உணவு மற்றும் நுகர்வோர் பாதுகாப்புத் துறை , அரசு கூடுதல் தலைமைச் செயலாளர் வெளியிட்டுள்ள அறிவிப்பில் கூறியிருப்பதாவது,
தமிழக அரசு குடும்ப அட்டைதாரர்களுக்கு இடையே எவ்விதப் பாகுபாடும் இன்றி அனைவருக்குமான பொது விநியோகத் திட்டத்தைத் தொடர்ந்து செயல்படுத்தி வருகிறது. இந்நிலையில் சமீபகாலமாக சமூக ஊடகங்கள் சிலவற்றில் மத்திய மற்றும் மாநில அரசு அலுவலர்களுக்கும், ஆண்டு வருமானம் ரூ.1 லட்சத்திற்கும் மேல் பெறும் குடும்பங்களுக்கும், ஐந்து ஏக்கருக்கு மேல் நிலம் வைத்திருக்கும் விவசாயிகளுக்கும், மூன்று அறைகள் கொண்ட கான்கிரீட் வீட்டில் குடியிருப்பவர்களுக்கும், பொது விநியோகத் திட்ட அரிசி இல்லை என்று எவ்வித முகாந்திரமும் அற்ற பொய்யான தகவல்கள் பரப்பப்படுவதாக அரசின் கவனத்திற்குக் கொண்டு வரப்பட்டு உள்ளது.
அனைவரும் பாராட்டும் வண்ணம் மிகவும் சிறப்பாகச் செயல்பட்டு வரும் அனைவருக்குமான பொது விநியோகத் திட்டத்தின் பலன்கள் அனைத்துக் குடும்ப அட்டைதாரர்களுக்கும் தொடர்ந்து வழங்கப்படுகிறது. இதில் எவ்வித மாற்றங்களும் மேற்கொள்ளப்படவில்லை.
தற்போது, அரிசி பெற்று வரும் அனைத்துக் குடும்ப அட்டைதாரர்களும் இலவச அரிசி மற்றும் பொது விநியோகத் திட்டத்தில், தற்போது மானிய விலையில் பெற்று வரும் அனைத்துப் பொருட்களையும் தொடர்ந்து பெற்று பொது விநியோகத் திட்டத்தின் பலன்களை அடையலாம் என, தெளிவு படுத்தப்படுகிறது. சமூக ஊடகங்களில் பரவி வரும் இதுகுறித்த செய்திகள் முற்றிலும் உண்மைக்குப் புறம்பானவை.
இவ்வாறு தெரிவித்துள்ளது.