டெல்லி: கார்கில் வெற்றி தினத்தையொட்டி, கார்கில் போரில் வீர மரணம் அடைந்த வீரர்களுக்கு ஜனாதிபதி முர்மு, பிரதமர் மோடி, பாதுகாப்புத்துறை அமைச்சர் ராஜ்நாத் சிங் உள்பட அமைச்சர்கள் அதிகாரிகள் அஞ்சலி செலுத்தினர்.
1999ம் ஆண்டு பாகிஸ்தானுடன் நடந்த கார்கில் போரில் இந்தியா வெற்றி பெற்றதை கொண்டாடும் விதமாக ஒவ்வொரு ஆண்டும் ஜூலை 26ம் தேதி கார்கில் வெற்றி தினம் (கார்கில் விஜய் திவாஸ்) கொண்டாடப்பட்டு வருகிறது. இந்த நிலையில் கார்கில் போரில் இறந்த வீரர்களுக்கு பிரதமர், ஜனாதிபதி அஞ்சலி செலுத்தி உள்ளனர்.
கார்கில் விஜய் திவாஸின் 26வது ஆண்டு நிறைவை வெள்ளிக்கிழமை இந்தியா பெருமையுடனும், தேசபக்தி உணர்வுடனும் அனுசரித்தது, 1999 கார்கில் போரின் போது தங்கள் இன்னுயிரை ஈந்த வீரமிக்க வீரர்களுக்கு மனமார்ந்த அஞ்சலி செலுத்தியது. பிரதமர் நரேந்திர மோடி, ஜனாதிபதி திரௌபதி முர்மு மற்றும் உயர் ராணுவ அதிகாரிகள் இந்தியாவின் பிராந்திய ஒருமைப்பாட்டைப் பாதுகாக்க செய்யப்பட்ட உயர்ந்த தியாகங்களை நினைவுகூரும் வகையில் நாட்டை வழிநடத்தினர் என தெரிவிக்கப்பட்டு உள்ளது.
இதுதொடர்பாக குடியரசு தலைவர் திரவுபதி முர்மு தனது எக்ஸ் வலைதளத்தில் வெளியிட்டுள்ள பதிவில், கார்கில் விஜய் தினத்தை முன்னிட்டு, தாய்நாட்டிற்காக தங்கள் இன்னுயிரை ஈந்த துணிச்சலான வீரர்களுக்கு நான் மனமார்ந்த அஞ்சலியை செலுத்துகிறேன். இந்த நாள் நமது வீரர்களின் அசாதாரண வீரம், துணிச்சல் மற்றும் உறுதிப்பாட்டின் அடையாளமாகும். நாட்டிற்காக அவர்களின் அர்ப்பணிப்பு மற்றும் உயர்ந்த தியாகம் எப்போதும் நாட்டு மக்களை ஊக்குவிக்கும். ஜெய் ஹிந்த்! ஜெய் பாரத்!
பிரதமர் மோடி தனது எக்ஸ் வலைதளத்தில் வெளியிட்டுள்ள பதிவில், கார்கில் வெற்றி தினமான இன்று நாட்டு மக்களுக்கு நல்வாழ்த்துக்கள். நாட்டின் சுயமரியாதையைப் பாதுகாக்க தங்கள் வாழ்க்கையை அர்ப்பணித்த இந்தியத் தாயின் துணிச்சலான மகன்களின் ஈடு இணையற்ற துணிச்சலையும் வீரத்தையும் இந்த சந்தர்ப்பம் நமக்கு நினைவூட்டுகிறது. தாய்நாட்டிற்காக இறக்க வேண்டும் என்ற அவர்களின் ஆர்வம் ஒவ்வொரு தலைமுறையினருக்கும் தொடர்ந்து ஊக்கமளிக்கும். ஜெய் ஹிந்த்!
1999ம் ஆண்டு யாரும் எதிர்பாராத நேரத்தில் ஜம்மு- காஷ்மீரின் கார்கில் பகுதியில் பயங்கரவாதிகளை போல பாகிஸ்தான் ராணுவம் அத்துமீறி நுழைந்தது. சிலபகுதிகளையும் கைப்பற்றியது. அப்போது இந்தியா ‘ஆபரேஷன் விஜய்’ நடவடிக்கையை கையில் எடுத்தது. மலைக்காடுகளுக்குள் புகுந்து இந்திய வீரர்கள் நடத்திய அதிரடி தாக்குதல்களால் பாகிஸ்தான் ராணுவத்தினர் தலைதெறிக்க திரும்பி ஓடினர். இதில் இந்திய ராணுவம் மகத்தான வெற்றியைப் பதிவு செய்தது. இந்த வெற்றியை கொண்டாடும் தினமாக கார்கில் வெற்றி தினம் ஒவ்வொரு ஆண்டும் ஜூலை 26ந்தேதி கொண்டாடி வருகிறது.
கார்கில் வெற்றி தினம்
இன்று ஜூலை 26 இந்திய இராணுவத்தின் சார்பில் 26வது கார்கில் வெற்றி தினம் அனுசரிக்கப்படுகிறது. எண்ணற்ற இந்திய வீரர்களின் தியாகத்தால் உருவான வரலாற்றுச் சிறப்புமிக்க வெற்றி தான் 1999 இல் பாகிஸ்தானை வென்று, கார்கில் பகுதியைக் கைப்பற்றியது. 26 ஆண்டுகள் கடந்து விட்ட நிலையிலும், நாட்டிற்காக இரத்தம் சிந்திய இராணுவ வீரர்களின் புகழ் இன்றும் உச்சத்தில் இருக்கிறது.
ஒருகாலத்தில் நட்பு நாடுகளாக இருந்த இந்தியாவும், பாகிஸ்தானும் இன்று எதிரெதிர் துருவங்களில் நிற்கின்றன. சுதந்திரத்திற்குப் பிறகு இரு நாடுகளும் காஷ்மீரை தங்களுடன் இணைத்துக் கொள்ள முயற்சி மேற்கொண்டன. பாகிஸ்தான் பழங்குடியின இஸ்லாமியர்களின் உதவியோடு சில பகுதிகளைப் கைப்பற்றின. இதுதான் பாகிஸ்தான் ஆக்கிரமிப்பு காஷ்மீர் என அழைக்கப்படுகிறது.
பிறகு காஷ்மீர் இந்தியாவுடன் இணையவே, பாகிஸ்தான் போர்த் தொடுக்கத் தொடங்கியது. இந்தியாவுக்கும் பாகிஸ்தானுக்கும் 1947 அக்டோபர் மாதத்தில் முதல் போர் நடைபெற்றது. இதனைத் தடுக்கும் விதமாக ஐநா பாதுகாப்பு கவுன்சில் தலையிட்டு சமாதான முயற்சிகளை மேற்கொண்டது.
1965 இல் காஷ்மீர் பகுதியில் பாகிஸ்தான் இராணுவம் அத்துமீறி நுழைய முயற்சித்தது. இதற்கு தக்க பதிலடி கொடுத்தது இந்தியா. கிட்டத்தட்ட 17 நாட்கள் நடந்த இப்போரில் பல ஆயிரக்கணக்கான உயிர்கள் பலியாகின. அடுத்ததாக 1971 இல் மீண்டும் இந்தியா – பாகிஸ்தான் போர் மூண்டது. இந்தப் போரின் முடிவில் தான் வங்காளதேசம் என்ற ஒரு புதிய நாடு உருவானது.
இந்தியா பாகிஸ்தான் போரில் மிகவும் முக்கியமானது கார்கில் போர். கடந்த 1999 இல் பாகிஸ்தான் இராணுவம் கார்கில் மலைப்பகுதியில் அத்துமீறி உள்நுழைந்தது. இந்தியா இந்தப் போரில் பாகிஸ்தானை வீழ்த்தவும், கார்கிலை பாதுகாக்கவும் ‘ஆப்ரேஷன் விஜய்’ எனப் பெயர் வைத்து தனது இராணுவப் படையை அனுபிப்யது. இந்திய இராணுவத்திற்கு விமானப் படையும் உதவியாக இருந்தது.
இந்த இடம் போர் செய்வதற்கு உகந்தது அல்ல. ஏனெனில் 16,000 அடி உயரத்தில் மலைமீது போர் செய்ய வேண்டிய கட்டாயத்தில் இந்திய இராணுவம் இருந்தது. கடுங்குளிரையும் பொருட்படுத்தாமல் பாகிஸ்தானை எதிர்த்து பதில் தாக்குதல் நடத்தி முன்னேறிச் சென்றனர் இந்திய இராணுவ வீரர்கள். பல இராணுவ வீரர்கள் தங்கள் உயிரை நாட்டிற்காக அர்ப்பணித்தனர்.
எங்கு பார்த்தாலும் துப்பாக்கிச் சூடு சத்தம் தான். குண்டுகள் வீரர்களின் உடலைத் துளைத்தன. 2 மாதங்கள் நடைபெற்ற கார்கில் போரில், இந்தியாவின் தாக்குதலை சமாளிக்க முடியாமல் பாகிஸ்தான் வெளியேறியது. இந்தப் போரில் இந்திய வீரர்கள் சுமார் 500 பேரும், பாகிஸ்தான் வீரர்கள் 4,000 பேரும் உயிரிழந்தனர்.
இறுதியாக இந்திய வீரர்கள் கார்கில் பகுதியை ஜூலை 26 இல் கைப்பற்றி, மலை உச்சியில் இந்திய தேசியக் கொடியை நட்டனர். இந்த நாளைத் தான் ஆண்டுதோறும் கார்கில் வெற்றி தினமாக கொண்டாடுகிறோம்.
இன்றைய இளம் தலைமுறையினருக்கு இராணுவ வீரர்களின் அர்ப்பணிப்பை எடுத்துரைத்து விழிப்புணர்வு ஏற்படுத்த வேண்டும். இன்றும் கூட எண்ணற்ற இராணுவ வீரர்கள் நாட்டைக் காக்க எல்லையில் கடுங்குளிரில் நெஞ்சுயர்த்தி நிற்கின்றனர். கார்கில் வெற்றி தினமான இன்று அனைத்து இராணுவ வீரர்களுக்கும் சல்யூட் அடிக்க வேண்டியது இந்திய குடிமகன்கள் அனைவரது கடமையாகும்.
