திருச்சி – விழுப்புரம் பயணிகள் ரயில் பகுதியளவில் ரத்து!தெற்கு ரயில்வே அறிவிப்பு!

திருச்சி: விழுப்புரம் – திருச்சி இடையே இயக்கப்படும் பயணிகள் ரயில் பகுதியளவில் ரத்து செய்யப்படுவதாக தெற்கு ரயில்வே திருச்சி கோட்டம் அறிவித்துள்ளது. மேலும் பல ரயில் சேவைகளிலும் மாற்றம் செய்யப்பட்டு உள்ளது.

விழுப்புரம் – திருச்சி இடையே உள்ள பழைய ரயில்வே மேம்பாலம் அகற்றும் பணி நடைபெறுவதால், 15 நாட்கள் பகுதியளவு சேவை ரத்து செய்யப்படுவதாக  தெற்கு ரயில்வே திருச்சி கோட்டம் அறிவிப்பு வெளியிட்டு உள்ளது.

இதுகுறித்து ரயில்வே வெளியிட்டுள்ள செய்திக்குறிப்பில்,  திருச்சி சந்திப்பு ரயில் நிலையம் அருகே பழைய ரயில்வே மேம்பாலத்தை இடித்து அகற்றும் பணிகள் நடைபெற உள்ளது. இதன் காரணமாக இந்த வழியாக இயக்கப்படும் சில ரயில்கள் பகுதியளவில் ரத்து செய்யப்படுகிறது. மேலும் ரயில்கள் புறப்படும் இடம் மற்றும் ரயில் இயக்கத்திலும் மாற்றம் செய்யப்பட்டு உள்ளது.

காலை 5.10 மணிக்கு விழுப்புரத்தில் இருந்து புறப்படும் விழுப்புரம் -திருச்சி பயணிகள் ரயில் (வண்டி எண். 06891) பொன்மலை -திருச்சி சந்திப்பு ரயில் நிலையம் இடையே நவம்பர் 6 முதல் 21 ம் தேதி வரை பகுதியளவில் ரத்து செய்யப்படுகிறது. இதனால் இந்த ரயில் பொன்மலையுடன் நிறுத்தப்படும்.

மறுமா ர்க்கமாக திருச்சியில் இருந்து விழுப்புரம் இயக்கப்படும் திருச்சி – விழுப்புரம் பயணிகள் ரயில் (வண்டி எண். 06892) நவம்பர் 6 முதல் 21ம் தேதி வரை, திருச்சி சந்திப்பு – பொன்மலை ரயில் நிலையங்களுக்கு இடையே பகுதியளவில் ரத்து செய்யப்படுகிறது.

இதனால் இந்த ரயில் மாலை 6.09 மணிக்கு பொன்மலை ரயில் நிலையத்தில் இருந்து விழுப்புரத்துக்குப் புறப்படும்.

காலை 9.45 மணிக்கு சென்னை எழும்பூரில் இருந்து, புறப்படும் சென்னை எழும்பூர் – குருவாயூர் விரைவு ரயில் (வண்டி எண்.16127) நவம்பர் 6 முதல் 21-ஆம் தேதி வரை வசதிக்குரிய ரயில் நிலையத்தில் 10 நிமிடம் நிறுத்தி இயக்கப்படும்.

நாகர்கோவிலில் இருந்து மும்பை சத்ரபதி சிவாஜி ரயில் முனையம் வரை இயக்கப்படும் விரைவு ரயில் (எண். 16352) நவம்பர் 7,10,14,17,21 தேதிகளில் வசதிக்குரிய ரயில் நிலையத்தில் 60 நிமிடம் நிறுத்தி இயக்கப்படும்.

காலை 5.50 மணிக்கு கன்னியாகுமரி ரயில் நிலையத்தில் இருந்து புறப்படும் கன்னியாகுமரி – ஹவுரா அதிவேக விரைவு ரயில் (எண்: 12666) நவம்பர் 9,16 தேதிகளில் வசதிக்குரிய ரயில் நிலையத்தில் 60 நிமிடம் நிறுத்தி இயக்கப்படும்.

காலை 8.40 மணிக்கு ராமேசுவரத்தில் இருந்து புறப்படும் ராமேசுவரம் – புவனேசுவரம் அதிவேக விரைவு ரயில் (எண்: 20895) நவம்பர் 10,17 தேதிகளில் வசதிக்குரிய ரயில் நிலையத்தில் 40 நிமிடம் நிறுத்தி இயக்கப்படும்.

மாலை 4.20 மணிக்கு வாராணாசியில் இருந்து புறப்படும் காசித் தமிழ் விரைவு ரயில் (எண்: 16368) நவம்பர் 12,19 தேதிகளில் வசதிக்குரிய ரயில் நிலையத்தில் 40 நிமிடம் நிறுத்தி இயக்கப்படும்

இவ்வாறு கூறப்பட்டுள்ளது.