ஈரான் மீது அமெரிக்கா மற்றும் இஸ்ரேல் தாக்குதலை அடுத்து மேற்காசியாவில் மிகப்பெரிய மோதல் வெடித்துள்ள சூழலில் கச்சா எண்ணெயை ஏற்றிச் செல்லும் கப்பல் ஹார்முஸ் ஜலசந்தியிலிருந்து இந்தியாவை அடைவது இதுவே முதல் முறை.
எண்ணெய் நிரப்பப்பட்ட கொள்கலன்களை ஏற்றிச் சென்ற லைபீரியாவை தளமாகக் கொண்ட ‘ஷென்லாங் சூயஸ்மேக்ஸ்’ கப்பல் புதன்கிழமை (மார்ச் 11) பிற்பகல் 1 மணிக்கு மும்பை துறைமுகத்தை அடைந்தது.
இதில் 1,35,335 டன் கச்சா எண்ணெய் உள்ளது. இது 36 மணி நேரத்திற்குள் மஹுல் மற்றும் கிழக்கு மும்பையில் உள்ள சுத்திகரிப்பு நிலையங்களுக்கு கொண்டு செல்லப்படும் என்று அதிகாரிகள் தெரிவித்துள்ளனர்.
மார்ச் 1 ஆம் தேதி சவுதி அரேபியாவில் உள்ள ராஸ் தனுரா துறைமுகத்திலிருந்து கொள்கலன்களில் கச்சா எண்ணெயை ஏற்றிச் சென்ற ‘ஷென்லாங் சூயஸ்மேக்ஸ்’ மார்ச் 3 ஆம் தேதி அங்கிருந்து புறப்பட்டது. கண்காணிப்பு தரவுகளின்படி, கப்பல் மார்ச் 8 ஆம் தேதி ஹார்முஸ் ஜலசந்தியில் இருந்தது, பின்னர் டிராக்கிங்கை நிறுத்தியது.
‘ஷென்லாங் ஷிப்பிங் லிமிடெட்’ நிறுவனத்திற்குச் சொந்தமான இந்தக் கப்பலில், இந்தியா, பாகிஸ்தான் மற்றும் பிலிப்பைன்ஸ் ஆகிய நாடுகளைச் சேர்ந்த 29 பணியாளர்கள் இருந்தனர்.
பாரசீக வளைகுடா பகுதியில் 28 இந்திய கப்பல்கள் உள்ளன. ஹார்முஸ் ஜலசந்தியின் மேற்கில் 24 கப்பல்களும் கிழக்கில் 4 கப்பல்களும் உள்ளன. அதில் உள்ள இந்தியர்களைப் பாதுகாப்பது எங்கள் பொறுப்பு என்று இந்திய அரசின் துறைமுகங்கள், கப்பல் போக்குவரத்து மற்றும் நீர்வழிகள் அமைச்சகம் கூறியுள்ளது.
மார்ச் 11 அன்று, இந்தியாவிற்கு சரக்குகளை ஏற்றிச் சென்ற ‘மயூரி நாரி’ என்ற கப்பல், ஹார்முஸ் ஜலசந்தி அருகே ஈரானிய ஏவுகணையால் தாக்கப்பட்டது. இந்த சம்பவத்தில் இரண்டு இந்தியர்கள் கொல்லப்பட்டனர்.
[youtube-feed feed=1]