சென்னை: தமிழ்நாட்டில் உள்ள நூலகங்களுக்கு நாளிதழ்கள், பருவ இதழ்கள் வாங்க புதிய குழு அமைத்து பள்ளிக்கல்வித்துறை அறிவிப்பு வெளியிட்டுள்ளது. அதன் படி, அண்ணா நூற்றாண்டு நூலகர் முனைவர் செ.காமாட்சியை ஒருங்கிணைப்பின் கீழ் 10 பேர் கொண்ட குழுவை அமைத்துள்ளது.
தமிழ்நாட்டில், பிரபலமான கன்னிமாரா பொது நூலகம், அண்ணா நூற்றாண்டு நூலகம் , 32 மாவட்ட மைய நூலகங்கள், 1926 கிளை நூலகங்கள், 14 நடமாடும் நூலகங்கள், 1915 நூலகங்கள், 745 பகுதி நேர நூலகங்கள் என மொத்தம் 4634 நூலகங்கள் உள்ளன. இந்த நூலகங்களில் பொதுமக்கள், இளைஞர்கள், மாணவர்கள் நாட்டு நடப்பு மற்றும் தகவல்களை தெரிந்துகொள்வதற்காக தினசரி நாளிதழ்கள், வார இதழ்கள், பொது அறிவு புத்தகங்கள், இலக்கியம் உள்பட பல்வேறு விதமான புத்தகங்கள், குறிப்பு நூல்கள் வாங்கப்பட்டு வருகின்றன.
நூலகங்களுக்கு எந்தெந்த புத்தகங்களை வாங்க வேண்டும் என்பதை தேர்வுசெய்ய தனியே தேர்வுக்குழு உள்ளது. இந்த தேர்வு குழுவிக்கு நாளிதழ் நிறுவனங்கள், பருவ இதழ் நிறுவனங்கள் மற்றும் புத்தங்களை வழங்க விரும்புவது தொடர்பாக விண்ணப்பிப்பார்கள். இவ்வாறு பதிப்பகத்தினர் விண்ணப்பித்த புத்தகங்களை தேர்வுக்குழு ஆய்வுசெய்து என்னென்ன புத்தகங்களை வாங்கலாம்? என்ற பட்டியலை அரசிடம் வழங்கும். பின்னர் அரசு அதற்கு அனுமதி வழங்கும். இதையடுத்தே, அரசு நூலகங்களுக்கு நாளிதழ்கள், பருவ இதழ்கள், புத்தங்கள் வாங்கப்படும்.
ஆனால், சமீப காலமாக, இந்த தேர்வு குழுவினர் ஒருதலை பட்சமாக செயல்படுவதாகவும், நாளிதழ்கள், புத்தகங்கள் வழங்கப்படுவதில் முறைகேடு நடைபெறுவதாக வும் புகார்கள் எழுந்தன. இதையடுத்து, தமிழகஅரசு, நூலகங்களுக்கு நாளிதழ்கள், பருவ இதழ்கள் வாங்க புதிய குழுவை அமைத்து உத்தரவிட்டு உள்ளது.
அதன்படி, அண்ணா நூற்றாண்டு நூலகர் முனைவர் செ.காமாட்சியை ஒருங்கிணைப்பாளராக நியமித்துள்ளது. அவரின் கீழ், இணைய இதழ்ஆசிரியர் சமஸ், ஜெயராணி, திணேஷ் அகிரா, அ.அருண்குமார், டாக்டர் கணேசன், முனைவர் விஜயபாஸ்கர், அதிஷா வினோ, முனைவர் வீ.அரசு, சுட்டி கணேசன் யுவராஜ், கரு.ஆறுமுகத்தமிழன் ஆகியோர் கொண்ட உறுப்பினர் குழுவை அமைத்துள்ளது.
இந்த குழுவினர் பொதுநுலக இயக்குனரின் கருத்துருவை பரிசிலனை செய்து, அரசுக்கு பரிந்துரைக்க வேண்டும் என்று கூறப்பட்டுள்ளது.
