பிரதமர் நரேந்திர மோடியின் தனிச் செயலாளராக ஐ.எஃப்.எஸ் அதிகாரி நிதி திவாரி நியமிக்கப்பட்டுள்ளதாக பணியாளர் அமைச்சகம் தனது உத்தரவில் தெரிவித்துள்ளது.
2014 ஆம் ஆண்டு பேட்ச் இந்திய வெளியுறவு சேவை (IFS) அதிகாரியான நிதி திவாரி, 2013 ஆம் ஆண்டு சிவில் சர்வீசஸ் தேர்வில் 96 வது இடத்தைப் பிடித்தார்.
தற்போது பிரதமர் அலுவலகத்தில் (PMO) துணைச் செயலாளராகப் பணியாற்றி வரும் இவர் பிரதமர் அலுவலகத்தில் சேருவதற்கு முன்பு, வெளியுறவு அமைச்சகத்தில் (MEA) ஆயுதக் குறைப்பு மற்றும் சர்வதேச பாதுகாப்பு விவகாரப் பிரிவில் பணியாற்றினார்.
பிரதமர் அலுவலகத்தில் (PMO) ஜனவரி 6, 2023 முதல் துணைச் செயலாளராகப் பணியாற்றி வரும் இவர் அதற்கு முன் அண்டர் செக்ரட்டரியாக பணியாற்றிவந்தார். துணைச் செயலாளராகப் பதவி உயர்வு பெற்ற பின் ‘வெளியுறவு மற்றும் பாதுகாப்பு’ பிரிவில் முக்கிய பங்கு வகித்த அவர், தேசிய பாதுகாப்பு ஆலோசகர் அஜித் தோவலுக்கு நேரடி தலைமையின் கீழ் பணியாற்றி வந்தார்.
வெளிவிவகாரங்கள், அணுசக்தி மற்றும் பாதுகாப்பு விவகாரங்கள் போன்ற முக்கிய இலாக்காக்களில் பணியாற்றிய நிதி திவாரி IFSஆக தேர்வான 10 ஆண்டுகளில் பிரதமரின் தனிச் செயலாளராக உயர்ந்திருப்பது பலரின் புருவங்களை உயர்த்தியுள்ளது குறிப்பிடத்தக்கது.