சென்னை: தங்கம் விலை சவரனுக்கு ரூ.600 உயர்ந்ருது, ஒரு சவரன் ரூ.89,600 ஆக அதிகரித்துள்ளது. நாளுக்கு நாள் உயர்ந்து வரும் தங்கத்தின் விலை சாமானிய மக்களிடையே அதிர்ச்சியை ஏற்படுத்தி உள்ளது.
சென்னையில் இன்று (அக் 07) 22 காரட் ஆபரண தங்கத்தின் விலை சவரனுக்கு ரூ.600 உயர்ந்து, ஒரு சவரன் ரூ.89,600க்கு விற்பனை செய்யப்படுகிறது. கிராமுக்கு ரூ.75 உயர்ந்து, ஒரு கிராம் ரூ.11,200க்கு விற்பனை ஆகிறது.
சர்வதேச நிலவரங்கள் மற்றும், அமெரிக்க டாலருக்கு நிகரான ரூபாய் மதிப்பில் ஏற்பட்டு வரும் மாற்றங்கள் காரணமாக, விலை உயர்வு – விலை காணப்படுகிறது. சமீப மாதங்களாக அமெரிக்காவின் வரி அதிகரிப்பு அறிவிப்பைத் தொடர்ந்து தங்கம் விலை வரலாறு காணாத அளவுக்கு உயர்ந்து வருகிறது. இதற்கு காரணம், சீனா உள்பட பல நாடுகள் தங்கத்தை வாங்கி குவிப்பதே காரணம் என்றும் கூறப்படுகிறது. நம் நாட்டில் கடந்த சில மாதங்களாகவே ஆபரண தங்கம் விலை தொடர்ந்து உயர்ந்து வருகிறது.
2025ம் ஆண்டு ஜனவரி 1ந்தேதி தங்கம் கிராம் 7,150 ரூபாய்க்கும், சவரன் 57,200 ரூபாய்க்கும் விற்கப்பட்டது. எனவே, கடந்த ஒன்பது மாதங்களில் மட்டும் தங்கம் விலை கிராமுக்கு 4,050 ரூபாயும், சவரனுக்கு 32,400 ரூபாயும் அதிகரித்து, தற்போது ரூ.90ஆயிரத்தை தொடங்கி உள்ளது. விரைவில் சவரன் தங்கம் விலை ரூ.1 லட்சத்தை எட்டும் என எதிர்பார்க்கப்படுகிறது.
தமிழகத்தில் கடந்த சனிக்கிழமை (அக்டோபர் 4ந்தேதி), 22 காரட் தங்கம் கிராம் 10,950 ரூபாய்க்கு விற்பனையானது. சவரனுக்கு 87,600 ரூபாய்க்கு விற்கப்பட்டது. வெள்ளி கிராம், 165 ரூபாய்க்கு விற்பனையானது. ஞாயிற்றுக்கிழமை தங்கம் சந்தைக்கு விடுமுறை. அன்று, முந்தைய நாள் விலையிலேயே ஆபரணங்கள் விற்பனையாகின.
திங்கட்கிழமையான நேற்று (அக் 06) காலை, தங்கம் விலை கிராமுக்கு 110 ரூபாய் உயர்ந்து, எப்போதும் இல்லாத வகையில் 11,060 ரூபாய்க்கும், சவரனுக்கு 880 ரூபாய் அதிகரித்து, 88,480 ரூபாய் என்ற உச்சத்தை எட்டியது. மேலும், நேற்று இரண்டாவது முறையாக மாலையும் விலை அதிகரித்தது. நேற்று மாலை, தங்கம் விலை கிராமுக்கு மீண்டும் 65 ரூபாய் அதிகரித்து, 11,125 ரூபாய்க்கு விற்பனையானது. சவரனுக்கு 520 ரூபாய் உயர்ந்து, 89,000 ரூபாய் என்ற புதிய உச்சத்தை எட்டியது.
இந்த நிலையில், இன்று (அக் 07) 22 காரட் ஆபரண தங்கத்தின் விலை சவரனுக்கு ரூ.600 உயர்ந்து, ஒரு சவரன் ரூ.89,600க்கு விற்பனை செய்யப்படுகிறது. கிராமுக்கு ரூ.75 உயர்ந்து, ஒரு கிராம் ரூ.11,200க்கு விற்பனை ஆகிறது.
தங்கம் விலை வரலாறு காணாத வகையில் புதிய உச்சம் தொட்டு வருவது சாமானிய மக்கள், நகைப்பிரியர்கள் மத்தியில் அதிர்ச்சியை ஏற்படுத்தி உள்ளது.
