டில்லி
சி பி எஸ் இ 10 மற்றும் 12 ஆம் வகுப்பு பொதுத் தேர்வுகள் மே 4 முதல் தொடங்க உள்ளதாக மத்திய அமைச்சர் ரமேஷ் போக்கிரியால் அறிவித்துள்ளார்.
நாடெங்கும் கொரோனா பரவல் காரணமாகக் கடந்த மார்ச் மாதம் பொது முடக்கம் அறிவிக்கப்பட்டது. அதையொட்டி மூடப்பட்ட பள்ளிகள் பெரும்பாலான மாநிலங்களில் திறக்கப்படவில்லை. ஒரு சில மாநிலங்களில் மட்டும் 10 மற்றும் 12 ஆம் வகுப்புக்களுக்கான ஆன்லைன் சிறப்பு வகுப்புகள் நடத்திக் கொள்ள அனுமதி அளிக்கப்பட்டுள்ளது.
வகுப்புக்கள் சரிவர நடக்காததால் சி பி எஸ் இ பள்ளிகளில் 10 மற்றும் 12 ஆம் வகுப்புக்களுக்கான தேர்வுகள் நடக்குமா நடக்காதா எனச் சந்தேகம் எழுந்தது., அந்த சந்தேகத்துக்குத் தீர்வு காணும் வகையில் மே மாதம் 4 ஆம் தேதி முதல் தேர்வுகள் தொடங்கும் என மத்திய கல்வித்துறை அமைச்சர் ரமேஷ் போக்கிரியால் இன்று அறிவித்துள்ளார்.
இந்த தேர்வுகள் ஆனலைன் மூலம் நடைபெறாது எனவும் தேர்வு மையங்களுக்கு மாணவர்கள் வந்து தேர்வு எழுத வேண்டும் எனவும் அமைச்சர் கூறி உள்ளார். இந்த தேர்வுகள் மே மாதம் 4 ஆம் தேதி அன்று தொடங்கி ஜூன் 14 வரை நடக்க உள்ளது. ஒவ்வொரு தேர்வுக்கும் இடையில் போதுமான தினங்கள் இடைவெளி இருக்கும் எனவும் ஜூலை 15 இல் தேர்வு முடிவுகள் வெளியாகும் எனவும் அமைச்சர் கூறி உள்ளார்.