பெங்களுரு,: கர்நாடக மாநிலத்தில் தனியார் தொலைக்காட்சியில் நடைபெற்று வரும் பிக்பாஸ் நிகழ்ச்சிக்கான செட்டை உடனே இழுத்து மூட அம்மாநில அரசின் மாசு கட்டுப்பாட்டு வாரியம் உத்தரவிட்டுள்ளது. மேலும் செட்டுக்கு வழங்கப்படும் மின்சாரத்தையும் துண்டிக்க அறிவுறுத்தி உள்ளது. இது பரபரப்பை ஏற்படுத்தி உள்ளது.
பிக்பாஸ் செட்டில் கழிவு நீர் அகற்றுதல் தொடர்பாக அரசின் விதிகள் புறந்தள்ளப்பட்டு விதி மீறல்கள் நடைபெற்றுள்ளதை தொடர்ந்து, அந்த செட்டை உடனே மூட மாசு கட்டுப்பாட்டு வாரியம் உத்தரவிட்டு உள்ளது.
நாடு முழுவதும் பிக்பாஸ் நிகழ்ச்சிகள் தனியார் தொலைக்காட்சிகளால் நடத்தப்பட்டு வருகிறது. இதுகுறித்த பல்வேறு விமர்சனங்கள் எழுந்தாலும், ஒரு மக்களிடையே பெரும் வரவேற்பு கிடைத்து வருகிறது. சமீபத்தில் ( அக்டோபர் 5 ஆம் தேதி) விஜய் தமிழ் தொலைக்காட்சியில், நடிகர் விஜய் சேதுபதி தொகுத்து வழங்க பிக்பாஸின் ஒன்பதாவது சீசன் தொடங்கியது. அதுபோல அண்டை மாநிலங்களான கர்நாடக மற்றும் ஆந்திராவிலும், கன்னட மற்றும் தெலுங்கு பிக்பாஸ் நிகழ்ச்சிகள் தற்போது நடைபெற்று வருகிறது.
கன்னட பிக்பாஸ் 12வது தொகுப்பு நிகழ்ச்சியை பிரபல கன்னட நடிகரான கிச்சா சுதீப் தொகுத்து வழங்கி வருகிறார். இந்த நிலையில், பிக்பாஸ் செட்டை இழுத்துமூட கர்நாடக மாநில மாசு கட்டுப்பாட்டு வாரியம் உத்தரவு பிறப்பித்துள்ளது பரபரப்பை ஏற்படுத்தியுள்ளது.
பெங்களூருவின் புறநகரில் உள்ள பிடாடி ஹோப்ளியில் உள்ள ஜாலி வுட் ஸ்டுடியோஸ் & அட்வென்ச்சர்ஸில் உள்ள பிக் பாஸ் செட் உள்ளது. இங்கு பிரபலங்கள் தங்கி விளையாடி வருகின்றனர். இந்த பிக்பாஸ் செட்டில் கழிவு நீர் அகற்றுதல் மற்றும் நீர் மேலாண்மை தொடர்பான விதி மீறல்கள் நடைபெற்றதாகவும் சுற்றுச்சூழல் விதிகளை பின்பற்றாததால் மூட கூறி உத்தரவு பிறப்பிக்கப்பட்டதாக மாசு கட்டுப்பாட்டு வாரிய தலைவர் நரேந்திர சுவாமி தெரிவித்தார்.
இதனால் பிக்பாஸ் சீசன் 12 இடையிலேயே நிறுத்தப்படுகிறதா என்பது குறித்து பல்வேறு தகவல்கள் பரவி வருகின்றனர். இதனால் கன்னட பிக்பாஸ் ரசிகர்கள் அதிர்ச்சி அடைந்துள்ளனர்.
முன்னதாக செய்தியாளர்களிடம் பேசிய மாசுகட்டுப்பாட்டு வாரிய தலைவர் நரேந்திரசுவாமி, பிக்பாஸ் செட் வளாகத்திலிருந்து சுத்திகரிக்கப்படாத கழிவுநீர் வெளியே வெளியேற்றப்பட்டு சுற்றுச்சூழல் மாசுபாட்டை ஏற்படுத்துகிறது என்றவர், செட் நிர்வாகம், கழிவுநிரை சுத்திகரிக்க, 250 KLD திறன் கொண்ட கழிவுநீர் சுத்திகரிப்பு நிலையத்தை (STP) நிறுவியதாகக் கூறினாலும், அந்த வசதியில் சரியான உள் வடிகால் இணைப்புகள் இல்லை என்றும், STP அலகுகள் செயல்படாமல், பயன்படுத்தப்படாமல் கிடப்பதையும், அதிகாரிகள் கண்டறிந்தனர். எந்தவொரு சுத்திகரிப்பும் இல்லாமல் கழிவுநீர் வெளிப்படையாக கழிநீர் வெளியே விடப்படுகிறது. இது சுற்றியுள்ள சுற்றுச்சூழல் அமைப்புக்கு கடுமையான அச்சுறுத்தலை ஏற்படுத்துகிறது.
மேலும், அதிகாரிகளின் ஆய்வில் செட்டின் உள்ளே மோசமான கழிவு மேலாண்மை நடைமுறைகளும் வெளிப்பட்டன. பிளாஸ்டிக் கப், காகிதத் தகடுகள் மற்றும் பிற தூக்கி எறியக்கூடிய பொருட்கள் போன்ற திடக்கழிவுகளை முறையாகப் பிரித்தெடுக்கவில்லை.
கழிவுநீர் எவ்வாறு நிர்வகிக்கப்படுகிறது அல்லது STP எவ்வாறு இயங்குகிறது என்பதைக் காட்டும் சரியான ஆவணங்கள் அல்லது ஓட்ட விளக்கப்படம் அந்த இடத்தில் இல்லை. கூடுதலாக, 625 kVA மற்றும் 500 kVA திறன் கொண்ட இரண்டு டீசல் ஜெனரேட்டர் (DG) தொகுப்புகள் வளாகத்தில் காணப்பட்டன, இது மேலும் சுற்றுச்சூழல் கவலைகளை எழுப்புகிறது.
இந்த பல மீறல்களைக் குறிப்பிட்டு, தயாரிப்புக் குழு சுற்றுச்சூழல் விதிமுறைகளை கடைபிடிக்கும் வரை பிக் பாஸ் கன்னட தளத்தில் நடவடிக்கைகளை உடனடியாக நிறுத்தி வைக்க மாசுக்கட்டுப்பாட்டு வாரியம் உத்தரவிட்டுள்ளது. அமலாக்க நடவடிக்கையின் ஒரு பகுதியாக, வசதிக்கான மின்சார விநியோகத்தை துண்டிக்க பெஸ்காமுக்கு அறிவுறுத்தப்பட்டுள்ளது.
