டெல்லி: இந்திய விமானப்படை ரகசியங்களை பாகிஸ்தானுக்கு கசியவிட்டதாக பஞ்சாபில் 2 பேர் கைது செய்யப்பட்டு உள்ளனர். இது பரபரப்பை ஏற்படுத்தி உள்ளது.
பஹல்காம் பயங்கரவாத தாக்குதலைத்தொடர்ந்து, பாகிஸ்தான்மீது இந்தியா பல்வேறு அதிரடி நடவடிக்கைகளை மேற்கொண்டுள்ளது. மேலும், பயங்கரவாதிகளுக்கும், அவர்களுக்கு துணைநிற்கும் நாடுகளுக்கும் பதிலடி கொடுக்கப்படும் என பிரதமர் மோடி கூறி உள்ளார். இதனால் இரு நாடுகள் இடையே பதற்றம் நிலவி வருகிறது.
இந்த நிலையில், இந்திய ராணுவ ரகசியங்களை பாகிஸ்தானுக்கு கசியவிட்ட குற்றச்சாட்டின் பேரில் பஞ்சாபில் இருவர் கைது செய்யப்பட்டுள்ளனர். இந்திய ராணுவத்தின் கண்டோன்மெண்ட் பகுதிகள் அமிர்தசரஸில் உள்ள ஏர்பேஸ் உள்ளிட்ட தகவல்களை பாலக் ஷெர் மாஸி, சூரஜ் மாஸி ஆகிய இருவர் பாக். – க்கு வழங்கியுள்ளதாக பஞ்சாப் மாநில டிஜிபி கவுரவ் யாதவ் தகவல் தெரிவித்துள்ளார்.
இதுகுறித்து அவர் வெளியிட்டுள்ள எக்ஸ் தள பதிவில், குறிப்பிடத்தக்க எதிர்-உளவு நடவடிக்கையில், அமிர்தசரஸில் உள்ள ராணுவ கன்டோன்மென்ட் பகுதிகள் மற்றும் விமானப்படை தளங்களின் முக்கியமான தகவல்கள் மற்றும் புகைப்படங்களை கசியவிட்டதில் பங்கு வகித்ததாகக் கூறப்படும் பாலக் ஷெர் மாசி மற்றும் சூரஜ் மாசி ஆகிய இருவரை அமிர்தசரஸ் கிராமப்புற காவல்துறை மே 3, 2025 அன்று கைது செய்தது.
முதற்கட்ட விசாரணையில், அமிர்தசரஸ் மத்திய சிறையில் அடைக்கப்பட்டுள்ள பிட்டு @ ஹேப்பி @ ஹர்ப்ரீத் சிங் மூலம் நிறுவப்பட்ட பாகிஸ்தான் உளவுத்துறை செயல்பாட்டாளர்களுடன் அவர்களுக்கு தொடர்பு இருப்பது தெரியவந்துள்ளது. அதிகாரப்பூர்வ ரகசியச் சட்டத்தின் கீழ் வழக்கு பதிவு செய்யப்பட்டுள்ளது, விசாரணை நடந்து வருகிறது. விசாரணை ஆழமடையும் போது மேலும் முக்கியமான தகவல்கள் வெளியாகும் என்று எதிர்பார்க்கப்படுகிறது.
பஞ்சாப் காவல்துறை இந்திய ராணுவத்துடன் வலுவாக நிற்கிறது, தேசிய நலன்களைப் பாதுகாப்பதில் அதன் கடமையில் அசைக்க முடியாத நிலையில் உள்ளது. நமது ஆயுதப்படைகளின் பாதுகாப்பைக் குறைமதிப்பிற்கு உட்படுத்தும் எந்தவொரு முயற்சியும் உறுதியான மற்றும் உடனடி நடவடிக்கைக்கு உட்படுத்தப்படும் என குறிப்பிட்டுள்ளார்.
