டெல்லி: முப்படை தளபதிகள் குழுவின் புதிய தலைவராக ராணுவ தளபதி மனோஜ் முகுந்த் நரவானே நியமனம் செய்து மத்தியஅரசு உத்தரவிட்டு உள்ளது. புதிய முப்படைகளின் தலைமை தளபதி நியமிக்கப்படும் வரை பழைய முறைப்படி, முப்படை தளபதிகள் குழுவின் தலைவராக இருப்பார் என தெரிவிக்கப்பட்டு உள்ளது.
இந்திய முப்படை தளபதியாக இருந்த பிபின்ராவத், ஹெலிகாப்டர் விபத்தில் மரணம் அடைந்ததைத் தொடர்ந்து, புதிய முப்படை தளபதியாக பதவி ஏற்க போவது யார் என்பது குறித்த கேள்வி எழுந்தது. இது தொடர்பாக பிரதமர், உள்துறை மற்றும் பாதுகாப்புத்துறை அமைச்சர் மற்றும் உயர் ராணுவ அதிகாரிகளுடன் ஆலோசனை நடத்தினார்.
இதையடுத்து, இடைக்கால நடவடிக்கையாக, முப்படை தளபதிகள் குழுவின் தலைவராக ராணுவ தளபதி மனோஜ் முகுந்த் நரவானே நியமனம் செய்து அறிவிக்கப்பட்டு உள்ளது. முப்படை தளபதிகளில் மூத்தவர் என்ற அடிப்படையில் முப்படை தளபதிகள் குழுவின் தலைவராக இராணுவ தளபதி மனோஜ் முகுந்த் நரவானே நியமிக்கப்பட்டுள்ளார்.