சென்னை: இன்று மாலை குருபெயர்ச்சியை யொட்டி ஆலங்குடி,தென்குடித்திட்டை வசிட்டேசுவரர் கோயில் உள்பட முக்கிய கோவில்களில் விசேஷ வழிபாடுகள் நடைபெற்றன. பல கோவில்களின் பக்தர்களின் நேரடி வழிபாட்டுக்கு மாவட்ட நிர்வாகம் அனுமதி மறுத்த நிலையில் ஆன்லைன் மூலம் பக்தர்கள் குருபகவானை தரசித்தனர்.
தேவர்களுக்கு எல்லாம் குரு வியாழன் பகவன் எனப்படும் குரு. நவக்கிரகங்களில் முழு சுப கிரகம் என அழைக்கப்படுகிறது. வாழ்வில் அனைத்து விதமான செல்வங்களையும் அளிப்பவர் – சப்த ரிஷிகளில் ஆங்கிரஸ முனிவரின் மகன் குரு என்றும் பிரகஸ்பதி என்றும் வியாழ பகவான் அழைக்கப்படுகிறார். ஒவ்வொருவர் வாழ்விலும், தனம் என்று சொல்லக்கூடிய பணம், 2-வது புத்திர சம்பத்து என்று சொல்லக்கூடிய குழந்தை செல்வம். இந்த இரண்டையும் அளிக்க கூடிய சர்வ வல்லமை பெற்ற கிரகம் குரு. குருவுக்கு மேலும் பல்வேறு விதமான ஆதிக்கங்கள் உள்ளன. ஞானம், கூர்ந்த மதிநுட்பம், மந்திரி யோகம், நிதித்துறை, நீதித்துறை, வங்கி, கல்வி, வேத உபதேசம் போன்றவை எல்லாம் குருவின் அதிகாரத்துக்கு உட்பட்டவை. அவரது அருள் இருந்தால் இந்த துறைகளில் பிரகாசிக்கலாம்.
குரு பகவான் இன்று பிலவ வருடம் ஐப்பசி 27 (நவம்பர் 13) அன்று மாலை 6.22 மணிக்கு மகர ராசியில் இருக்கும் அவிட்டம் 2ம் பாதத்திலிருந்து கும்ப ராசியில் இருக்கும் அவிட்டம் நட்சத்திரம் 3ம் பாதத்திற்கு குரு பெயர்ச்சி ஆகி உள்ளார்
இவர் கும்ப ராசியில் 2022ஆம் ஆண்டு ஏப்ரல் மாதம் வரை பயணம் செய்வார். திருக்கணித பஞ்சாங்கப்படி குரு பகவான் கார்த்திகை மாதம் 4ஆம் தேதி நவம்பர் 20ஆம் தேதியன்று சனிக்கிழமையன்று மகர ராசியில் இருந்து கும்ப ராசிக்கு இடப்பெயர்ச்சியாகிறார்.
குரு பெயர்ச்சியையொட்டி கோவில்களில் சிறப்பு பூஜைகள், யாகங்கள் நடைபெற்றன. குரு பரிகார ஸ்தலங்களில் ஒன்றான தஞ்சாவூர் மாவட்டத்தில் அமைந்துள்ள தெந்திட்டை வசிஸ்டேஸ்வரர் கோவில், திருவாரூர் மாவட்டம் ஆலங்குடியில் உள்ள அருள்மிகு ஆபத்சகாயேசுவரர் [குருஸ்தலம்] திருக்கோயில், சென்னை பாடியில் அமைந்துள்ள திருவலிதாயம் திருவல்லீசுவரர் திருக்கோயில் போன்ற கோவில்களில் விசேஷ பூஜைகள் நடைபெற்றன. இந்த கோவில்களில் பக்தரகள் தரிசனத்துக்கு தடை விதிக்கப்பட்ட நிலையில், ஆன்லைன் மூலம் நேரடி ஒளிபரப்பு செய்யப்பட்டன.
இந்த குரு பெயர்ச்சியால் மேஷம், மிதுனம், சிம்மம், துலாம், மகரம் ராசிக்காரர்கள் அதிக பலனை அடையப்போகின்றனர். திருமணம் சுபகாரியம் நடைபெறும், புத்திரபாக்கியம் கிடைக்கும். புதிய வேலையும் வேலையில் புரமோசனும் கிடைக்கும். வீடு மனை வாங்கும் எண்ணங்கள் நிறைவேறும். குரு பலன் வந்துள்ளதால் இந்த ராசிக்காரர்களுக்கு ராஜயோகம் கை கூடி வந்துள்ளது.
இந்த குரு பெயர்ச்சியால் ரிஷபம், கடகம், கன்னி விருச்சிகம், தனுசு, கும்பம், மீனம் மற்றும் குரு தசை குரு புக்தி நடப்பவர்கள் பரிகாரம் செய்யலாம். இவர்களுக்கு குருவின் சஞ்சாரம் சாதகமாக இல்லாத காரணத்தால் பண விசயத்தில் கவனமாக இருக்கவேண்டும். சுப காரிய முயற்சிகளில் கவனமும் நிதானமும் தேவை. வேலை செய்யும் இடத்தில் உயரதிகாரிகள் சொல்வதை கேட்டு நடப்பது அவசியம்.