புதுச்சேரி
பாஜக சார்பில் போட்டியிட வாய்ப்பு கிடைக்காத நிலையில் அக்கட்சிக்கு ஆதரவாக நடிகை கவுதமி பிரசாரம் செய்கிறார்.
பிரபல நடிகைகள் கவுதமி மற்றும் குஷ்பு ஆகியோர் தமிழக சட்டப்பேரவை தேர்தலில் போட்டியிடுவார்கள் என எதிர்பார்ப்பு இருந்தது. அதற்கேற்றாற்போல் கவுதமி ராஜபாளையம் தொகுதியிலும் குஷ்பு சேப்பாக்கம் திருவல்லிக்கேணி தொகுதியிலும் களப்பணியில் ஈடுபட்டனர். தொகுதி மக்களும் இவர்கள் போட்டியிடுவார்கள் என எண்ணினர்.
ஆனால் அதிமுக கூட்டணியில் பாஜகவுக்கு ஒதுக்கப்பட்ட தொகுதிகளில் இந்த இரு தொகுதிகளும் இடம் பெறவில்லை. இதனால் இருவரும் கடும் ஏமாற்றம், அடைந்தனர். அந்தந்த தொகுதி மக்களுக்கு நன்றி தெரிவித்து அறிக்கை விடுத்தனர். இந்நிலையில் பாஜக தனது ஆயிரம் விளக்கு தொகுதி வேட்பாளராக நடிகை குஷ்பு வை அறிவித்தது. அவரும் பிரசாரம் மேற்கொண்டார்.
நடிகை கவுதமிக்கு தேர்தல் வாய்ப்பு அளிக்கவில்லை. தற்போது அவர் பாஜகவுக்குப் பிரசாரம் செய்ய உள்ளார் எனத் தகவல்கள் வெளியாகி உள்ளது. இது குறித்து நடிகை கவுதமி தனது டிவிட்டரில்,
”வருகின்ற புதுச்சேரி சட்டமன்றத் தேர்தலில் பாஜக வேட்பாளர்களை பெரு வெற்றி பெற செய்ய வேண்டி, இன்று புதுச்சேரி மற்றும் காரைக்காலில் மக்களிடம் பரப்புரை செய்கிறேன்”
எனப் பதிந்துள்ளார்.