புதுச்சேரி: புதுச்சேரி டிஜிபி பாலாஜி ஸ்ரீவத்சவா டெல்லிக்கு இடமாற்றம் செய்யப்பட்டு உள்ளார்.
புதுச்சேரியில் வரும் 2021ம் ஆண்டு சட்டசபை தேர்தல் நடக்க உள்ளது. இதையடுத்து அம்மாநிலத்தில் தேர்தல் கால பணிகளை அனைத்து அரசியல் கட்சிகளும் துவக்கின. அதன் ஒரு பகுதியாக, தேர்தல் தொடர்பான வாட்ஸ் அப் குழுக்களில் புதுச்சேரி போலீசார் பலர் இணைந்திருந்தனர்.
அவர்களை அக்குழுவில் இருந்து விலகி, நடுநிலையாக கடமையாற்ற வேண்டும் என்று டிஜிபி பாலாஜி ஸ்ரீவத்சவா உத்தரவிட்டு இருந்தார். அதன்படி ஏராளமான காவல்துறையினர் பல்வேறு அரசியல் குழுக்களில் இருந்து விலகினர்.
இந் நிலையில் புதுச்சேரி டிஜிபி பாலாஜி ஸ்ரீவத்சவா டெல்லிக்கு பணியிடம் மாற்றம் செய்யப்பட்டுள்ளார். அவருக்கு பதிலாக புதுச்சேரியின் புதிய டிஜிபியாக ரன்வீர் சிங் கிருஷ்யா நியமிக்கப்பட்டு உள்ளார். அதற்கான உத்தரவை மத்திய உள்துறை அமைச்சகம் வெளியிட்டு உள்ளது. பணியிடம் மாற்றம் செய்யப்பட்ட பாலாஜி ஸ்ரீவத்சவா, 1988ம் ஆண்டு ஐபிஎஸ் கேடரை சேர்ந்தவர் ஆவார்.