டெல்லி: உச்ச நீதிமன்றத்தின் 53-வது தலைமை நீதிபதியாக மூத்த நீதிபதி சூர்யா காந்த் பதவி ஏற்றார். அவருக்கு குடியரசு தலைவர் திரவுபதி முர்மு பதவி பிரமாணம் செய்து வைத்தார். முன்னதாக அவர் இந்திய தலைமை நீதிபதியாக அக்டோபர் 30-ம் தேதி நியமிக்கப்பட்டார்.
முன்னதாக, இந்தியாவின் 52வது தலைமை நீதிபதியாக இருந்த பி.ஆர். காவாய் நவம்பர் 23 அன்று ஓய்வுபெற்ற நிலையில், நாட்டின் 53வது தலைமை நீதிபதியாக நீதிபதி சூர்யா காந்த் இன்று பதவி ஏற்றார். இவர் சுமார் 15 மாதங்கள் இந்தப் பதவியில் நீடிப்பார். அவர் தனது 65வது வயதை எட்டும்போது, அதாவது பிப்ரவரி 9, 2027 அன்று ஓய்வு பெறுவார்.
நீதிபதி சூர்யா காந்த் அவர்கள் 1962 ஆம் ஆண்டு பிப்ரவரி 10 ஆம் தேதி ஹரியானாவின் ஹிசார் மாவட்டத்தில் ஒரு நடுத்தரக் குடும்பத்தில் பிறந்தார். ஒரு சிறிய நகர வழக்கறிஞராக இருந்து இந்தியாவின் மிகவும் மதிக்கப்படும் சட்ட நிபுணர்களில் ஒருவராக உயர்ந்த அவர், தேசிய முக்கியத்துவம் வாய்ந்த மற்றும் அரசியலமைப்பு ரீதியாக முக்கியமான பல தீர்ப்புகளுக்கு பங்களித்துள்ளார்.
2011 ஆம் ஆண்டில் குருஷேத்ரா பல்கலைக்கழகத்தில் தனது முதுகலை சட்டப் படிப்பில் முதல் வகுப்பில் முதல் மாணவராகத் தேர்ச்சி பெற்ற பெருமையையும் நீதிபதி சூர்யா காந்த் பெற்றுள்ளார். உச்ச நீதிமன்றத்திற்கு உயர்த்தப்படுவதற்கு முன்னர், அவர் பஞ்சாப் மற்றும் ஹரியானா உயர் நீதிமன்றத்தில் பல குறிப்பிடத்தக்க தீர்ப்புகளை வழங்கினார். பின்னர் அவர் அக்டோபர் 5, 2018 முதல் ஹிமாச்சலப் பிரதேச உயர் நீதிமன்றத்தின் தலைமை நீதிபதியாக பணியாற்றினார்.
உச்ச நீதிமன்றத்தில் அவரது பதவிக் காலத்தில், சரத்து 370 நீக்கம், பேச்சு சுதந்திரம் மற்றும் குடியுரிமை உரிமைகள் தொடர்பான முக்கியமான தீர்ப்புகளை அவர் வழங்கியுள்ளார். தேர்தல் நடைபெறவுள்ள பீகார் மாநிலத்தில் சிறப்பு தீவிர திருத்தம் (SIR) நடத்த தேர்தல் ஆணையத்தின் முடிவை எதிர்த்து தாக்கல் செய்யப்பட்ட மனுக்களை விசாரித்தபோது, வாக்காளர் வரைவுப் பட்டியலில் இருந்து நீக்கப்பட்ட 65 லட்சம் வாக்காளர்களின் விவரங்களை வெளியிட தேர்தல் ஆணையத்தை அவர் வலியுறுத்தினார்.
அடித்தட்டு ஜனநாயகம் மற்றும் பாலின நீதியை வலியுறுத்தும் ஒரு தீர்ப்பில், சட்டவிரோதமாகப் பதவியில் இருந்து நீக்கப்பட்ட ஒரு பெண் ஊராட்சித் தலைவரை (சர்பஞ்ச்) மீண்டும் பதவியில் அமர்த்திய அமர்வுக்கு அவர் தலைமை தாங்கினார். இதில் சம்பந்தப்பட்டிருந்த பாலின சார்பு நிலையையும் அவர் எடுத்துரைத்தார். உச்ச நீதிமன்ற பார் அசோசியேஷன் உட்பட பார் அசோசியேஷன்களில் மூன்றில் ஒரு பங்கு இடங்களை பெண்களுக்கு ஒதுக்கீடு செய்யுமாறு உத்தரவிட்ட பெருமையும் நீதிபதி காந்த் அவர்களுக்கு உண்டு.
