30 லட்சம் அமைப்புசாரா தொழிலாளர்களுக்கு QR குறியீட்டுடன் கூடிய ஸ்மார்ட் ஐடி கார்டுகளை வழங்க தமிழக அரசு முன்வந்துள்ளது.
கட்டுமானத் தொழிலாளர்கள், ஓட்டுநர்கள் மற்றும் ஆட்டோமொபைல் தொழிற்சாலை ஊழியர்கள் என பல லட்சம் ஊழியர்கள் இந்த திட்டத்தால் பயனடைவார்கள்.
மாநிலத்தில் சுமார் 85 லட்சம் அமைப்புசாரா தொழிலாளர்கள் உள்ளனர், அவர்களில் 35 லட்சம் பேர் வெளிமாநில புலம்பெயர்ந்த தொழிலாளர்கள் என்பது குறிப்பிடத்தக்கது.
தமிழக அரசின் இந்த அறிவிப்பு, அமைப்புசாரா துறை தொழிலாளர்களுக்கான நலத்திட்ட நடவடிக்கைகளின் ஒரு பகுதியாகும், இதில் கிக் தொழிலாளர்களுக்கான இரு சக்கர வாகன மானியங்கள், கிக் தொழிலாளர்களுக்கான ஏசி அறைகள் மற்றும் இலவச காப்பீடு ஆகியவை அடங்கும்.
“தொழிலாளர்கள் எங்கும் காட்ட ஒரு அடிப்படை அடையாளம் தேவை. சரியான நபர்களுக்கு நலத்திட்ட விநியோகத்தை விரிவுபடுத்தவும் முரண்பாடுகளை களையவும் அரசாங்கத்திற்கும் ஒரு நெறிப்படுத்தப்பட்ட தரவுத்தளம் தேவை.
ரேஷன் விவரங்களையும் இதன் மூலம் அணுகலாம். தரவு அரசாங்கத்திடம் சேமிக்கப்படும், மேலும் காலப்போக்கில், அதில் நலத்திட்ட விவரங்களைச் சேர்ப்போம்” என்று தொழிலாளர் துறை அதிகாரி ஒருவர் தெரிவித்ததாக டைம்ஸ் ஆப் இந்தியா செய்தி வெளியிட்டுள்ளது.
மேலும், QR குறியீட்டுடன் கூடிய ஸ்மார்ட் ஐடி கார்டுகளை விநியோகிக்கும் ஆபரேட்டரை அடையாளம் காண தொழிலாளர் நலத் துறை டெண்டர்களை கோரியுள்ளது.
மாநில அரசின் இந்த முயற்சியை தமிழ்நாடு கட்டுமானத் தொழிலாளர்கள் நல வாரியத் தலைவர் பொன். குமார் மற்றும் சுமை ஏற்றுதல் மற்றும் இறக்குதல் தொழிலாளர் சங்க மாநில செயலாளர் ஆர். அருள்குமார் உள்ளிட்டோர் வரவேற்றுள்ளனர்.
