ஏர் இந்தியா விபத்து விசாரணையில் ஐ.நா. புலனாய்வாளரை அனுமதிக்க இந்தியா மறுப்பு தெரிவித்ததாக தகவல் வெளியாகி உள்ளது.
ஏர் இந்தியா விபத்து விசாரணையில் முக்கியமான கருப்புப் பெட்டி தரவுகளை பகுப்பாய்வு செய்வதில் தாமதம் ஏற்பட்டதாக சில பாதுகாப்பு நிபுணர்கள் விமர்சித்த நிலையில், ஐ.நா. புலனாய்வாளரை இந்தியா நிராகரித்ததாக, இந்த விஷயத்தை நன்கு அறிந்த இரண்டு மூத்த ஆதாரங்களை மேற்கோள்காட்டி ராய்ட்டர்ஸ் செய்தி வெளியிட்டுள்ளது.
ஐக்கிய நாடுகள் சபையின் விமானப் போக்குவரத்து நிறுவனம், நடந்து வரும் போயிங் 787-8 ட்ரீம்லைனர் விபத்து விசாரணைக்கு உதவ அதன் புலனாய்வாளர்களில் ஒருவரை இந்தியாவுக்கு வழங்குவதற்கான நடவடிக்கையை எடுத்ததாகக் கூறப்படும் நிலையில் இந்த தகவல் வெளியாகியுள்ளது.
முன்னதாக, சர்வதேச சிவில் விமானப் போக்குவரத்து அமைப்பு (ICAO), 2014 இல் மலேசிய விமானம் கடலில் மூழ்கியது மற்றும் 2020 இல் உக்ரேனிய ஜெட்லைனர் போன்ற பல விசாரணைகளுக்கு உதவ புலனாய்வாளர்களை நியமித்துள்ளது, ஒரே வித்தியாசம் என்னவென்றால், அந்த நேரத்தில் அந்த நிறுவனத்திடம் உதவி கேட்கப்பட்டது.
இந்தியாவில் இருந்த புலனாய்வாளருக்கு பார்வையாளர் அந்தஸ்து வழங்கப்பட வேண்டும் என்று ஐ.சி.ஏ.ஓ கேட்டிருந்தது, ஆனால் இந்திய அதிகாரிகள் அந்த வாய்ப்பை மறுத்ததாக கூறப்படுகிறது. விபத்து நடந்த இரண்டு வாரங்களுக்குப் பிறகு புலனாய்வாளர்கள் விமானப் பதிவுத் தரவை பதிவிறக்கம் செய்ததாக வியாழக்கிழமை மத்திய சிவில் விமானப் போக்குவரத்து அமைச்சகம் தெரிவித்துள்ளது.
ராய்ட்டர்ஸ் அறிக்கையின்படி, ஜூன் 13 அன்று மீட்கப்பட்ட ஒருங்கிணைந்த கருப்புப் பெட்டி அலகு மற்றும் ஜூன் 16 அன்று கண்டுபிடிக்கப்பட்ட இரண்டாவது தொகுப்பு உள்ளிட்ட விசாரணை குறித்த தகவல்கள் இல்லாதது குறித்து பாதுகாப்பு நிபுணர்கள் கேள்வி எழுப்பினர்.
பெயர் குறிப்பிட விரும்பாத இந்திய விமானப் போக்குவரத்து அமைச்சக அதிகாரி ஒருவர், இந்த துறை “அனைத்து ICAO நெறிமுறைகளையும்” பின்பற்றி வருவதாக ராய்ட்டர்ஸிடம் தெரிவித்தார். முக்கியமான நிகழ்வுகள் குறித்த புதுப்பிப்புகளை ஊடக பிரதிநிதிகள் வெளியிட்டுள்ளதாக அந்த அதிகாரி மேலும் கூறினார்.
பெரும்பாலான விமான விபத்துக்கள் பல காரணிகளால் ஏற்படுகின்றன, விபத்து நடந்த சுமார் 30 நாட்களுக்குப் பிறகு முதற்கட்ட அறிக்கை எதிர்பார்க்கப்படுகிறது. ஜூன் 12 அன்று, அகமதாபாத் விமான நிலையத்திலிருந்து புறப்பட்ட ஒரு நிமிடத்திற்குள் ஏர் இந்தியாவின் விமானம் விபத்துக்குள்ளானது.
விமானத்தில் இருந்த பணியாளர்கள் உட்பட 241 பேர் விபத்தில் இறந்தனர், ஒருவர் மட்டுமே உயிர் பிழைத்தார். விமானம் பிஜே மருத்துவக் கல்லூரி மற்றும் மருத்துவமனையின் விடுதி கட்டிடத்தில் மோதியது, இதனால் தரையில் இருந்த 30 க்கும் மேற்பட்டோர் உயிரிழந்தனர்.
