உறவுகள் – கவிதை பகுதி 4
இந்நாள் மகள்
பா. தேவிமயில் குமார்
இளவரசன் என்றும்
எழிலரசன் என்றும்
சீராட்டியவர்கள்
“சீ” போ என விரட்டி விட்டனரே !
கடலில்
கலக்காமல்
களர் நிலத்தில்
கலந்த “ஆறு” நாங்கள் !
நீந்த வழியில்லாமல்
நிலை தடுமாறி விழுந்த
நிலாக்கள்,
நாங்கள் அல்லவா ?
ஜனனம் இல்லாத
ஜனத்தொகை கொண்ட
ஜாதி நாங்களல்லவா ?
அழகியல் மேலும்
அன்பியல் மேலும்
எங்களுக்கிருக்கும்
ஈர்ப்பு உங்களுக்கு
எப்போதும் புரியப் போவதில்லை !
கருப்பண்ணன்
கோயிலுக்கு வேண்டியே
உன்னைப் பெற்றேன்
என அம்மா, சிறுவயதில்
உச்சி முகர்ந்த போது, அவள்
அறியவில்லை,
என் பிறப்பின்
இரகசியத்தை !
வீட்டுக்கு ஒரு
விளக்கேற்றும்
தேவதையைக் கூட்டி வா,
என அம்மா
என் திருமண வயதில்
சொன்ன போது
சிந்தினேன் மனக் கண்ணீரை !
எனக்குப் பிறகு
இந்த குடும்பத்தை
ஏற்று நடத்திடு,
என தந்தை
சொன்ன போது
எந்த வார்த்தைகளும்
என்னிடமில்லை சொல்லிட !
ஆணாகப் பிறந்தும்
அவஸ்தைப் படுகிறோம்
அல்லும் பகலும்
எங்கள் “செல்கள்”
ஏங்கித் தவிப்பது
உங்களுக்குத் தெரியுமா ?
கரும் கூந்தலும்
கண் மையும்
முகப் பூச்சும்,
நகப் பூச்சும்,
உதட்டுச் சாயமும்
உருவ மாற்றமும்
குதிகால் உயர செருப்பும்
கழுத்தில் அணிகலனும்,
கையில் வளையும்
கால் கொலுசும்
மஞ்சள் கயிறும்
மலர்ச் சரங்களும்
மகிழ்வுடன் சூட
மனம் ஏங்குகிறது !
மனதில் ஒரு வலியும்
உடலில் ஒரு வலியும்
அப்பப்பா,
அய்யய்யோ, வேதனை ! வேதனை !
எங்கள் பாதைகளில்
ஏனிந்த குறுக்கீடுகள் ?
எங்களுக்கென ஒரு
உலகத்தில் வாழ
ஆசைப்படும் போது
அவமானத்தையே சந்திக்கிறோம் !
ஓடிக் கொண்டேயிருக்கிறோம்
தேடித் தேடி வந்து
அடிக்கிறீர்கள், வார்த்தைகளால்
விடிவில்லையா ? இதற்கு ?
ஏழு உலகங்கள் இருக்கிறதென
புராணங்கள் கூறுகின்றன !
அதில் எங்களுக்கு
ஏதாவது ஒரு உலகத்தை
ஒதுக்கி விடுங்களேன் ! அங்கே
ஓடி விடுகிறோம் !
அப்போதாவது
ஓய்ந்திடுமா ?
உங்கள் ஏளனப் பார்வை
படிப்பும் பண்பும்
பல இருந்தாலும் எங்களை
பாவப்பட்டவர்களாகப்
பார்க்காதீர்கள் !
எங்களாலும் வாழமுடியும்
வழி விடுங்களேன் !
சமூகமே !
கேலி பேசவும்,
கிண்டல் செய்யவும்,
கிடைத்தவர்கள்
நாங்கள் தானா ?
விருப்பப்பட்டு,
வேண்டுமென்றே தான்
பெண்ணாக மாறினோம்
பின் ஏன், _ _ _ _ _ _
பட்டப்பெயர்கள் ???
எங்களையும் இனி
அம்மா,
அக்கா,
என பெண் பாலினமாகவே
அழைக்கலாமே !!!
ஆணாக வாழப் பிடிக்காமல் தானே
அவஸ்தைகளை.
அனுபவித்து
பெண்ணானோம் !
அவஸ்தைப்பட்ட
அந்த பிறப்பிலிருந்து
ஆசைப்பட்ட
இந்த உருவத்திற்கு
மாறி நிற்கிறோம் !
மனிதர்கள் தானே
நீங்களும் ??
மனங்களைப்
புரிந்துகொள்ளாத
மனிதர்கள்………
அந்த வாழ்க்கை
அப்பப்பா, “நரகம்”
ஆனால்……
இந்த வாழ்க்கை
சொர்க்கம் தான்……..
சாதாரண சொர்க்கமல்ல
“கொடூர சொர்க்கமாக”
மாற்றிவிட்டீர்கள்
மனிதர்களே !
இப்படிக்கு
கண்ணீருடன்
முன்னாள் மகன்
இந்நாள் மகள்