ரூ.200 கோடி செலவில் தாலுகா வாரியாக மாணவர்களுக்கு ஆதார் வழங்க நடவடிக்கை

மாணவர்களுக்கு ஆதார் வழங்குவதற்காக தாலுகா வாரியாக ரூ.200 கோடி செலவில் ஆதார் இயந்திரம் அமைக்க நடவடிக்கை எடுக்கப்படும் என்று செய்திகள் வெளியாகியுள்ளன.

aadhar

மத்திய, மாநில அரசின் சலுகைகள் பெறுவதற்கு ஆதார் எண் கட்டாயம் என்ற நிலை தற்போது உள்ளது. ஆனால், அரசின் சேவைகளுக்கு ஆதாரை கட்டாயமாக்க கூடாது என்று உச்சநீதிமன்றம் வலியுறுத்தியும் அதனை மத்திய அரசு கண்டுக் கொள்ளவில்லை. இதனிடையே பள்ளி மாணவர்களுக்கும் ஆதார் எண் அவசியம் என்று ஆதார் ஆணையம் தெரிவித்திருக்கிறது.

இதன் காரணமாக ஆதார் அட்டை இருந்தால் மட்டுமே மாணவர்கள் பள்ளியில் சேர்க்கப்படுகிறார்கள் என்றும், ஆதார் இல்லாத மாணவர்களை பள்ளியில் சேர்க்க அனுமதிக்க மறுப்பதாகவும் நாடு முழுவதும் புகார்கள் வந்துள்ளன. இந்த புகாரை தொடர்ந்து ஆதாரை காரணம் காட்டி மாணவர்களை பள்ளிகளில் சேர்க்காமல் இருப்பது குற்றம் என்றும் அதற்குப் பதிலாக வேறு அடையாள அட்டைகளைப் பெற்றுக் கொண்டு மாணவர்களை அனுமதிக்க வேண்டும் என்றும் ஆதார் ஆணையம் சுற்றறிக்கை அனுப்பியது.

இந்நிலையில், மாணவர்களுக்கு ஆதார் வழங்குவதற்காக, தாலுகா வாரியாக 200 கோடி ரூபாய் செலவில் ஆதார் இயந்திரம் அமைக்க ஆதார் ஆணையம் முன்வந்துள்ளது. தாலுகாவுக்கு இரண்டு வீதம் நாடு முழுவதும் ஆதார் இயந்திரங்கள் வழங்கப்பட்டு, மாணவர்களுக்கு ஆதார் எண் வழங்க இந்த நடவடிக்கை எடுக்கப்பட்டுள்ளது. இதற்கான தொகை 200 கோடி ரூபாயை மாநில அரசுக்கு வழங்கப்படும் என்றும், அந்தந்த மாநில நிர்வாகம் தங்கள் வசதிக்கு ஏற்றார் போல் தபால் நிலையங்கள், தாலுகாக்கள், பள்ளிகளில் ஆதார் இயந்திரம் அமைத்து மாணவர்களுக்கு ஆதார் எண் வழங்லாம் என்றும் தெரிவிக்கப்பட்டுள்ளது.




English Summary
uidai-earmarks-rs-200-crore-to-fund-aadhaar-enrolment-machines-for-schools-in-talukas