தமிழ்நாட்டில் டேட்டிங் ஆப்கள் மூலம் ஆண்களை குறிவைத்து கோடிக்கணக்கில் பணம் பறிக்கும் மோசடி அதிகரித்து வருகிறது. காதல் மற்றும் நட்பு என்ற பெயரில் பழகி, பின்னர் கிரிப்டோ முதலீட்டில் அதிக லாபம் கிடைக்கும் என்று ஆசைகாட்டி பணத்தை பறிக்கும் இந்த மோசடிக்கு ‘Pig Butchering’ என்று பெயர்.
சென்னையைச் சேர்ந்த தேசியமயமாக்கப்பட்ட வங்கி ஊழியர் மனோகரிடம், டேட்டிங் ஆப் மூலம் லண்டனில் வசிப்பதாகக் கூறிய பெண் ஒருவர் அறிமுகமாகியுள்ளார். வாட்ஸ்அப்பில் தொடர்ந்து பேசி நம்பிக்கையை ஏற்படுத்திய அந்தப் பெண், தான் கிரிப்டோகரன்சி வர்த்தகம் செய்து வருவதாகவும், அதில் அதிக லாபம் கிடைப்பதாகவும் கூறியுள்ளார்.
பின்னர் ஒரு கிரிப்டோ வர்த்தக இணையதளத்தை அறிமுகப்படுத்தி, அதில் முதலீடு செய்ய மனோகரை சம்மதிக்க வைத்துள்ளார். அந்தப் பெண் கூறிய வங்கி கணக்குகளில் படிப்படியாக பணத்தை செலுத்திய மனோகர், சுமார் 2 மாதங்களில் ரூ.14 கோடி வரை முதலீடு செய்ததாகக் கூறப்படுகிறது.
இணையதளத்தில் முதலீட்டுக்கு அதிக லாபம் கிடைத்ததாகக் காட்டப்பட்ட நிலையில், பணத்தை திரும்பப் பெற முயன்றபோது ரூ.30 லட்சம் கட்டணம் செலுத்த வேண்டும் எனக் கூறியுள்ளனர். அப்போது தான் தான் ஏமாற்றப்பட்டதை மனோகர் உணர்ந்துள்ளார்.
தமிழ்நாட்டில் இதுபோன்ற டேட்டிங் மற்றும் கிரிப்டோ மோசடிகளில் சிக்கி பலர் கோடிக்கணக்கில் பணத்தை இழந்துள்ளதாக சைபர் கிரைம் போலீசார் தெரிவித்துள்ளனர். குறிப்பாக அதிக பணம் வைத்திருப்பவர்களை மட்டுமின்றி, நடுத்தர வர்க்கத்தினரையும் மோசடியாளர்கள் குறிவைத்து வருவதாக கூறப்படுகிறது.
‘Pig Butchering’ என்றால் என்ன?
காதல் அல்லது நட்பு என்ற பெயரில் முதலில் சமூக வலைதளங்கள், டேட்டிங் ஆப்கள் அல்லது திருமண இணையதளங்கள் மூலம் தொடர்பு கொள்வார்கள். தொடர்ந்து பல நாட்கள் பேசி நம்பிக்கையை ஏற்படுத்துவார்கள். பின்னர் கிரிப்டோ அல்லது ஆன்லைன் முதலீட்டில் அதிக லாபம் கிடைக்கும் என்று கூறி முதலீடு செய்ய வைப்பார்கள்.
முதலில் சிறிய தொகைக்கு லாபம் கிடைப்பது போல இணையதளத்தில் காட்டுவார்கள். இதை நம்பி பாதிக்கப்பட்டவர்கள் மேலும் மேலும் பணத்தை முதலீடு செய்வார்கள். இறுதியில் பணத்தை எடுக்க முயன்றால் வரி, கட்டணம், அபராதம் என பல காரணங்களைக் கூறி கூடுதல் பணம் கேட்பார்கள். அதன் பிறகு அந்த இணையதளம் முடக்கப்பட்டுவிடும் அல்லது மோசடியாளர்கள் தொடர்பை துண்டித்துவிடுவார்கள்.
இந்த முறையில் பாதிக்கப்பட்டவர்களை பல மாதங்கள் பேசி ‘பழுக்க வைப்பதால்’, மோசடியாளர்களே இதற்கு ‘Pig Butchering’ என்று பெயரிட்டதாக கூறப்படுகிறது.
வெளிநாடுகளில் இருந்து செயல்படும் மோசடி கும்பல்கள்
இந்த மோசடிகளில் ஈடுபடும் பல கும்பல்கள் மியான்மர், லாவோஸ், கம்போடியா போன்ற நாடுகளில் இருந்து செயல்படுவதாக தமிழ்நாடு போலீசார் தெரிவித்துள்ளனர்.
சில நேரங்களில் வேலைவாய்ப்பு என்ற பெயரில் இளைஞர்களை வெளிநாடுகளுக்கு அழைத்துச் சென்று, அங்கு சைபர் மோசடிகளில் ஈடுபடுத்துவதாகவும் போலீசார் கூறுகின்றனர். சமூக வலைதளங்களில் வேலைவாய்ப்பு விளம்பரங்களைப் பார்த்து ஏமாறும் இளைஞர்கள், வெளிநாடுகளுக்கு அழைத்துச் செல்லப்பட்டு கட்டாயமாக மோசடிகளில் ஈடுபடுத்தப்படும் சம்பவங்களும் நடந்து வருகின்றன.
திருமண இணையதளங்களிலும் மோசடி
டேட்டிங் ஆப்களைப் போலவே திருமண இணையதளங்கள் மூலமும் மோசடிகள் நடைபெறுகின்றன. வெளிநாட்டில் வசிப்பதாகக் கூறி போலி சுயவிவரங்களை உருவாக்கும் மோசடியாளர்கள், பெண்கள் மற்றும் ஆண்களிடம் நட்பாகப் பேசி நம்பிக்கையை ஏற்படுத்துகின்றனர்.
பின்னர் வெளிநாட்டில் இருந்து பரிசுப் பொருள் அனுப்பியுள்ளதாகக் கூறி, சுங்க வரி செலுத்த வேண்டும் என பணம் கேட்பது ஒரு வழக்கமான மோசடி முறையாக உள்ளது.
ஒரு பெண்ணிடம், வெளிநாட்டில் இருந்து பரிசுப் பொருள் வந்துள்ளதாகவும், அதை பெற சுங்கக் கட்டணம் செலுத்த வேண்டும் என்றும் கூறி ரூ.11 லட்சம் வரை மோசடி செய்யப்பட்டதாக போலீசார் தெரிவித்துள்ளனர்.
போலீசாரின் எச்சரிக்கை
டேட்டிங் அல்லது திருமண இணையதளங்களில் அறிமுகமாகும் நபர்களின் அடையாளத்தை உறுதி செய்யாமல் அவர்களை நம்பக்கூடாது. வீடியோ அழைப்பு அல்லது நேரில் சந்திப்பை தவிர்க்கும் நபர்களிடம் எச்சரிக்கையாக இருக்க வேண்டும்.
அதிக லாபம் தருவதாகக் கூறப்படும் முதலீட்டு திட்டங்களை நம்ப வேண்டாம். வங்கி கணக்கு விவரங்கள், OTP, கடவுச்சொற்கள் மற்றும் கிரிப்டோ வாலட் விவரங்களை யாரிடமும் பகிரக்கூடாது.
ஆன்லைன் மோசடியில் பணத்தை இழந்தால் உடனடியாக 1930 என்ற சைபர் குற்ற உதவி எண்ணுக்கு அழைக்க வேண்டும். மேலும் தேசிய சைபர் குற்றப்புகார் இணையதளத்திலும் புகார் அளிக்கலாம்.